🇰🇷【首爾｜美食】弘大燒肉推介－목구멍(Moggumeong)必食水芹菜配焦脆五花肉

今次分享位於弘大的人氣燒肉店——목구멍(Moggumeong)，因為聽講夜晚經常爆滿要排長龍，加上網上評價一直相當不錯，所以今次特登避開晚飯時間，與朋友選擇平日中午前往～其實목구멍已經有唔少分店，算係近年非常有人氣的連鎖燒肉店。店舖名목구멍韓文直譯其實係「喉嚨」的意思，雖然唔知點解用「喉嚨」做店名，不過夠特別，令人印象深刻！另外，店員會全程幫手燒，對遊客相當友善，店內亦提供中文餐牌，即使唔識韓文都唔需要太擔心～

//餐廳資訊在文末//

餐廳簡介｜韓國人都排隊食的燒肉店

因為今次特登避開繁忙時間，星期三下午1點左右到達，完全唔需要排隊，店內只坐滿一半左右，而且正對面係另一間好出名嘅弘大燒肉店「小豬存錢筒」，下次再試呢間 🙂

店內環境

當日大概一半遊客、一半韓國人，感覺목구멍(Moggumeong)係遊客間已經幾出名，但同時都仲有好多韓國人會去食。餐廳係用傳統鐵鑊蓋燒盤，同一般韓式燒肉店見到嘅烤網唔太一樣。

名人簽名牆

一入去就即刻見到有3面名人簽名牆，令我更期待五花肉到底有幾驚艷XD

韓式小菜及醬料

一坐低店員就會送上一大盤韓式小菜及醬料，基本韓式燒肉店會見到嘅小菜都有齊，有生菜、紫蘇葉、泡菜、芽菜、醃洋蔥、蒜頭等(小菜食完可以免費追加)，食燒肉小菜都好重要，唔係間間都會有咁多款式的，店員會將芽菜、泡菜同蒜頭會同肉類一齊放係鐵盤上面加熱

醬料有3款，包飯醬、甜醬(紅色的)，另有一個帶酸味、似泰式感覺嘅醬，燒肉後會一直放係鐵盤上面，但我都係最愛包飯醬(傳統口味~)

點餐方式

餐牌有中英日文翻譯

雖然今次忘記影低餐牌，但見到餐牌有齊中文、英文同日文翻譯(因為今次係弘大店，唔太肯定其他分店有冇翻譯)~所以弘大店對於唔識韓文嘅旅客相當友善，點餐冇難度！

肉類最少要點三人份

要留意，無論幾多人入座用餐，第一次點餐都需要最少點三份肉！可以點不同的肉類，店內只有3款，分別係五花肉、豬頸肉同牛排骨肉(價錢會放係最後)，之後如果想追加，就可以一份一份落單，一份肉150g。

食物表現

五花肉及豬頸肉

共叫咗2輪，第一輪叫咗五花肉2份、豬頸肉1份、水芹菜1份，店員會幫手燒，完全唔需要自己燒，而且燒肉前係用一件肥豬肉的油脂先係鐵鑊上燒一陣先，之後再燒肉。食完第一啖已經明白點解咁多人推介，五花肉外層燒得好焦脆，入口油脂香濃但唔會覺得過份油膩，肉汁亦保留到。豬頸肉雖然都好香，口感有彈性，但我個人覺得五花肉太出色，如果第一次到訪목구멍，五花肉係必點，食完第一輪3份肉，我想再點3份五花肉，但朋友想試牛排骨肉又唔想只有五花肉，所以第2輪3款肉各1份～

水芹菜燒肉

除咗五花肉之外，水芹菜亦係其中一個特色，水芹菜燒過之後同五花肉或者豬頸肉一齊食，可以中和油膩感，或者加泡菜同蒜頭包埋一齊，食落冇咁滯

第二輪追加食物：

五花肉 × 1
豬頸肉 × 1
牛排骨肉 × 1
冷麵 × 2
白飯 × 1

牛排骨肉

牛排骨肉其實都唔差，特別係配芥末同鹽一齊食，不過燒好之後最好即刻夾起係碗或者即刻食，因為我地掛住傾偈，牛肉一直係鐵板上面，到最後先食就偏硬，不過如果要我排序，我會將五花肉放第一位！但餐廳同時有豬肉同牛肉選擇，如果同行朋友有人唔食其中一種肉，都仲有其他選擇～

冷麵

韓國人食燒肉配冷麵真係有原因，冰涼又有少少酸甜味嘅冷麵配熱辣辣燒肉，口感好夾好清新！同埋食完幾輪燒肉之後，再食冷麵，即刻感覺清爽～3個人叫咗1個白飯、2碗冷麵，但下次再食會1人1碗冷麵～

餐牌價格參考

五花肉：14,000 WON／150g
豬頸肉：14,000 WON／150g
牛排骨肉：22,000 WON／150g
水芹菜：5,000 WON
水冷麵：6,000 WON
白飯：1,000 WON

總結｜值得再Encore的弘大燒肉店

餐廳3款肉類都試過，3人食咗2輪，最後共食咗11萬WON，人均約36,700WON（約港幣200左右／台幣800左右），以弘大人氣燒肉店，我覺得價錢都算合理，而且份量都好夠。今次食完목구멍之後，完全明白點解會成為韓國人都願意排隊嘅燒肉店，無論係五花肉、水芹菜配搭、店員服務，都令人滿意。下次再食會選擇必食的五花肉、水芹菜、冷麵！想搵一間弘大燒肉推介名單入面值得試嘅餐廳的話，목구멍(Moggumeong)絕對值得放入行程^^

餐廳資訊

店名：목구멍 홍대점

電話：010-5960-2930

營業時間：星期一至日 12:00-00:00 (最後下單時間：23:20)

英文地址：Seoul, Mapo-gu, World Cup buk-ro 4-gil, 8 1/F

韓文地址：서울특별시 마포구 월드컵북로4길 8, 1층

NAVER地圖(弘大店)：https://naver.me/GUwSxgH4